štorije po istrijanski

da se ne zatare istrijanska besida

RSS 2.0

Nike pute

nikepute

Nike pute mi se počme naglo pišati i čujen kako da iman vime mrež nogah kujo me pretiže i zadiva. Žvelto se hitin zad graže, ma vrag uta kaplja ne zajde van zmene.

Nike pute mi se zapera kako da san od slame učinjen. Usta mi se usuše i budu puna praha od sena. Brgeše i košulja me tekaju ujidati.  Da ki puhne u me jepranda bin se raspa kako bala od slame kad njoj prerižeš špage.

Nike pute, kad gonin krave u pašu, noge mi se tekaju zaplitati i kako da ču pasti. Priškuri mi se sprid voči i odjedan put vidin samo kopita i spone moje Vijole. Z usti taknen zemlju a u livo uho mi ujde skakavac.

Nike pute u svaken čoviku vidin đavla. S črljenin očima me gleda fišo i dela uno z jezikon. Glava mu se ubrača sve naokolo, a iz trbuha mu se čuju čriva kako makinjaju.

Nike pute ustanen bez petita i niš ne jin sedan dan. Živin od zraka. Ne pišan ni ne seren. Samo gledajući druge kako jidu se najin. I potlje gren spati i spin ki zna koliko. Forši janke po cila dva tri dana se ne budin. I ne sanjivan niš.

Nike pute ne kapin niš. U glavi čujen samo mužiku limene glazbe iz Lovreča. Mario z Lakovići tuče u bubnje, a Kosić z Pajara sviri s pijati. Ma čigova je una mala ča puše u frulu? A ki če platiti te rože?

Categories: Štorije

Barba Barba
Ja san Barba, i pišen štorije. Na istrijanski - ko ne kapiš, ki ti je kriv. Još ko si iz Istre a ne kapiš, more te sran biti! Pitaj mater ili voca da te navadi.

One Response to “Nike pute”


Pušti kuju lipu besidu:

Nečemo ti ne ukresti imejl, njanke ga pokazati svima tote.

Moreš janke metati uve HTML stvari: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>