štorije po istrijanski

da se ne zatare istrijanska besida

RSS 2.0

Ja ne verujen u nič

zito

Nono, nono, u ča ti veruješ? – doša je niki dan jopet ciganjati moj nuk. Ja ne verujen u nič! To san mu zajno reka i to drito u voči. Brižno dite jepranda se valje prenulo, pak san steši ništo mora reči – da u ništo verujen. Pak san mu reka…

Verujen u zemlju i u nebo! Zemlja ki nan daje šenicu da imamo od česa zamisiti kruh, a u nebo kamo čemo poj svi kad bude ura. Sad si na zemlji, a potlje češ biti na nebu, i to je sva mudrost, i to je jistina, bez škerci. I u to ja verujen.

Pogledaj gori uni oblak. Gori stava toja nona i gleda nas svaki dan. Mahni njoj, ja je mašen svaki dan, bilo di da san, ko kopan loze u Maruvih, ko kosin travu u Kortini.

Pogledaj tu zemlju, nu zagrabi jenu šaku, šu, brez straha, se ne zmažeš ne. Vidiš kako je lipa, ponjuši je, ja je janke pokusin nike pute. Na jeziku najbolje znaš ko je dobra za lozu eli ne.

Kad dojde ura svi čemo mi jisti zemlju i stavati na nebu, kako i naša nona. I niš nan ne bude falilo. Janke igrački če biti koliko češ.

Nono, a ča janke auto na baterije ču mati? Ma sve, tič muoj! I poša je veseja skakljajuči u kortu, balati se i hitati pljočke, i svako na toliko bi mahnuja prema nebu.

Nisan ma srca mu reči da ne verujen u nič.

Categories: Štorije

Barba Barba
Ja san Barba, i pišen štorije. Na istrijanski - ko ne kapiš, ki ti je kriv. Još ko si iz Istre a ne kapiš, more te sran biti! Pitaj mater ili voca da te navadi.


Pušti kuju lipu besidu:

Nečemo ti ne ukresti imejl, njanke ga pokazati svima tote.

Moreš janke metati uve HTML stvari: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>